Тирана си го сака "албанскиот дел" во Македонија

АКО КОСОВО СЕ ПОДЕЛИ
Тирана си го сака "албанскиот дел" во Македонија

Македонија вчера побара официјално објаснување од Тирана за изјавата на албанскиот министер за надворешни работи за промена на границите во регионот во случај на поделба на Косово. Шефицата на дипломатијата Илинка Митрева вчера го повикала албанскиот амбасадор во земјава, но и телефонски разговарала со министерот Бесник Мустафај за да побара објаснување лично од него. Шефот на албанската дипломатија Мустафај во вторникот за телевизијата Алсат изјави дека "ако има поделба на Косово, Албанија не дава веќе гаранции за непроменливост на границите, не само за Косово, туку и за албанскиот дел на Македонија".



БРИСЕЛ БРИФИРАН ЛАНИ



- Денеска во МНР беше повикан амбасадорот на Република Албанија за да ја објасни изјавата на министерот Мустафај. Денеска се слушнав лично со него и побарав објаснување. Ми беше соопштено дека Република Албанија настојува односите со нашата држава да бидат на што е можно повисоко ниво и да не се доведува во прашање принципот на добрососедство и на севкупна соработка.

Албанија не може да гарантира непроменливост на границите кон Македонија и Косово, ако српската покраина се подели, изјави во вторникот шефот на албанската дипломатија Бесник Мустафај.

- Тирана е подготвена за секој случај и ако Косово биде поделено, Албанија не дава гаранции за непроменливоста на границите - изјави Мустафај за телевизијата Алсат, одговарајќи на прашањето за тезата за присоединување на Косово со Албанија во случај на независност.

- Уште во лани во октомври во Брисел пред високи дипломати реков дека ако има поделба на Косово, Албанија не дава веќе гаранции за непроменливост на границите, не само за Косово, туку и за албанскиот дел на Македонија - рече Мустафај, зборувајќи во емисијата "Контраст" на албанската сателитска телевизија.

- Ние постојано ги следиме состојбите и како држава и како влада, и ве убедуваме дека Албанија во ниту една дадена состојба нема да остане неподготвена за да најде решение - додаде албанскиот министер.

По овие изјави, шефицата на македонската дипломатија веднаш решила да побара објаснување од Тирана.



ГРЕШКА ВО ПРЕВОДОТ?



Митрева вчера рече дека во телефонскиот разговор на својот колега му рекла оти за неа е спорно како Албанија може да дава гаранции за границите на Македонија.

- За нашите граници можеме да даваме гаранции само ние - рече Митрева.

Таа додава дека во разговорот истакнала оти Македонија е унитарна држава и оти "не може да се зборува за албански или македонски делови, туку станува збор за карактер на една единствена држава, која е впишана во државите со унитарна природа."

- Побарав од мојот албански колега ставовите на државите за вакви деликатни прашања да се пренесуваат или искажуваат со прецизност за да не се фрла сенка врз заемните односи. Ми беше кажано дека има грешки во нашиот превод, но и дека некои работи се извадени од контекст бидејќи се кажани во октомври лани во некоја друга пригода - рече Митрева.

Владата да го прогласи за непожелна личност министерот Бесник Мустафај и да ги бојкотира средбите со него, побара вчера Павле Трајанов, лидер на Демократскиот сојуз.

Според него, изјавата на Мустафај со која најавува промени на границите значи територијални претензии кон Македонија.

- Неприфатлив е ставот на државниот врв дека Македонија ќе го поддржи решението што ќе го постигнат Приштина и Белград во согласност со меѓународната заедница. Овој став е капитулантски оти ако дојде до промени на границите на Балканот тоа ќе се одрази негативно врз суверенитетот на Македонија, а токму тоа го најавува Мустафај - изјави Трајанов.

Пратеникот од ПДП, Исмет Рамадани рече дека според него изјавата на албанскиот министер е во контекст на тоа дека дециден став на МКГ е да нема поделба на Косово, а во исто време тоа значи да не се одразува сето тоа во државите-соседи на Косово.

Албанија го негира принципот на неменливост на границите, кој е основниот столб на стабилноста на Европа, изјави Слободан Чашуле, пратеник на ВМРО-Народна.

- Вакви изјави може да се оквалификуваат како мешање во внатрешните работи на нашата држава и може да ги наруши добрососедските односи - изјави Чашуле.

http://star.dnevnik.com.mk/default.aspx?pbroj=3013&stID=75179&pdate=20060316