Видеоинсталација на Лилјана Ѓузелова

ПРЕС ТУ ЕГЗИТ
Видеоинсталација на Лилјана Ѓузелова

Самостојна изложба на Лилјана Ѓузелова со наслов „Вечното враќање 4“ ќе биде отворена вечерва, во 20 часот, како дел од програмата „Предавања, презентации и изложби“ во галеријата „Прес ту егзит“.

Проекцијата на видеоартот „Вечното враќање 4“, која е дел од изложбата, ќе почне во 20 часот, а за вечерта на отворањето е предвидена само една проекција.

Продукцијата на видеоартот е помогната од Швајцарската програма за култура во Македонија.

Изложбата „Вечното враќање 4“ претставува видеоинсталација составена од еден уметнички објект и видеопроекција. Видеоартот, кој ќе биде проектиран во заднината на еден расклопен метален сандак, е видеозапис на перформансот што Ѓузелова го изведе на 17 октомври во 2004 година на Зајчев Рид, но исто така претставува и повеќеслоен колаж на многу документи, фотографии и сеќавања со кои авторката ги сумира и претходните три проекти од серијата „Вечното враќање“.

Првиот проект од оваа серија, резултат на истражувањата што авторката ги почна уште во 1995 година, беше изведен во приватна куќа во Маџир Маало во 1997 година, вториот во Музејот на градот Скопје во 2001 година, а третиот во Отвореното графичко студио во 2003 година. Куратор на четирите проекти од серијата „Вечното враќање“ е Сузана Милевска.

Различните верзии и сведоштва за последните денови на Димитар Ѓузелов, таткото на Ѓузелова и еден од првите македонски философи, ја поттикнаа авторката да го исцрта подотворениот круг на претпоставеното место на закопувањето на погубеното тело на татко и. Со тоа, Ѓузелова на еден индиректен начин и со современ ликовен јазик ја деконструира историската нарација за овој комплексен и се уште неразјаснет случај.

http://www.vreme.com.mk/DesktopDefault.aspx?tabindex=2&tabid=1&EditionID=694&ArticleID=44051