Денеска се одбележува 11 Октомври
Цвеќе на спомениците во повеќе градови, дебата и врачување на наградите „11 Октомври“ се дел од активностите со кои денеска ќе бидат одбележани 67 години од Денот на народното востание во Македонија. Собраниски делегации денеска ќе положат цвеќе на Партизанските гробишта во Скопје и на гробот на командантот на Главниот штаб на НОВ, Михајло Апостолски, на споменикот на првиот претседател на Президиумот на АСНОМ, Методија Андонов Ченто, и во Паркот на револуцијата во Прилеп, како и во Спомен-костурницата на паднатите борци во Куманово.
Јавна дебата на тема „Зошто востанието во 1941 година го кренале комунисти?“ ќе се одржи во Скопје, во Културниот центар „Точка“. Организаторот најави дека ќе учествуваат историчари, универзитетски професори и учесници во востанието. Дебатата почнува во 16.30 часот.
Традиционално, на празникот, во Собранието, ќе биде врачена годишната државна награда „11 Октомври“ која се доделува за животно дело во областа на науката, уметноста, стопанството и другите дејности од јавен интерес.
Годинашни добитници на наградата се професор д-р Коста Пеев, лингвист, професор д-р Михајло Миновски, историчар, и Истражувачкиот центар за генетско инженерство и биотехнологија на МАНУ. Наградата за животно дело во областа на културата и уметноста ќе му биде врачена на пистелот и академик Божин Павловски.
http://www.dnevnik.com.mk/?itemID=FADF964989A0594090988EF0131DD2FA&arc=1
