РЕЦИДИВИ ОД ДВЕТЕ СВЕТСКИ ВОЈНИ

РЕЦИДИВИ ОД ДВЕТЕ СВЕТСКИ ВОЈНИ

Македонската метропола лежи на бомби

На територијата на Скопје има се' уште неексплодирани бомби и гранати, заостанати од двете светски војни, но не може да се претпостави нивниот точен број, велат експертите

На територијата на Скопје има се' уште неексплодирани бомби и гранати, заостанати од двете светски војни, но не може да се претпостави нивниот точен број, велат експертите. Според нив, најмногу неексплодирани направи има во северните подрачја на градот, кон планината Скопска Црна Гора, во населбата Јане Сандански, каде што некогаш се наоѓал воен аеродром и околу Кале.

Деминерите од Дирекцијата за заштита и спасување вчера на воениот полигон Криволак ја уништија бомбата од 200 килограми, која пред четири дена беше пронајдена при изградбата на станбена зграда зад Универзалната сала. Според долгогодишното искуство на деминерските тимови, бомбата од улицата Христо Смирненски е најголемата што била пронајдена досега. Не е исклучено да има уште вакви, предупредуваат експертите.

- Неексплодирани бомби и гранати има на територијата на цела Македонија. Досега сме нашле многу неективирани авионски бомби, но ниту една не била голема како последната. Најизразено присуство на неексплодирани направи има во јужна Македонија, во Гевгелиско, Валандовско, Битолско. Најголем дел од нив потекнува од Втората, а има и од Првата светска војна. Во скопскиот регион, најмногу неексплодирани бомби сме извлекле од подножјето на Скопска Црна Гора. И во самиот град сме пронаоѓале бомби, но не толку големи. Можно е во Скопје да има уште „гиганти“ од 200 кила, а се откриваат случајно. Институциите и граѓаните кога случајно ќе ги пронајдат ни се јавуваат и ние излегуваме на самото место за најмногу два часа - вели Љупчо Петровски, раководител во Дирекцијата за заштита и спасување.

Сите пронајдени неексплодирани бомби се уништуваат на воениот полигон Криволак. Направата што беше деактивираната вчера, била од германско потекло, останата од бомбардирањето на Скопје во 1941 година. Германските воени единици утрото на шести април ги нападнале поголемите аеродроми во Кралството Југославија, меѓу кои и аеродромите во Скопје и Куманово. Во попладневните часови во истиот ден, бомбардиран бил и центарот на главниот град, при што загинале 600 лица, а над 1.000 биле ранети.

Но, во Скопје и во другите македонски градови не паѓале само германски бомби. Имало и британско-американски, чија цел биле воените објекти и комуникациските системи на Дванаесеттата германска армија, која била под команда на Фелдмаршал Вилхелм Лист.

- Во 1944 година, дел од сојузничката авијација која бомбардирала извори на нафта во градот Плоешти во Романија, на враќање кон Медитеранот извршила удар врз германските упоришта во Скопје. За да се неутрализира фашистичката моќ, сојузниците бомбардирале неколку локации во Скопје, за кои сметале дека претставуваат стратегиски точки за Германците. Според некои сознанија, најмногу бомби биле испуштени врз и околу тврдината Кале - вели генерал Тодор Атанасовски.

http://www.dnevnik.com.mk/?itemID=61FE1207FF360C438ABBBA6CF13E8F36&arc=1

Петар Чулев